NOTICIAS
AXENDA
Un encontro para coñecer experiencias inspiradoras e novas oportunidades na carreira investigadora.
A Escola de Enxeñaría Industrial (EEI) e CINTECX organizan o vindeiro 18 de xuño a xornada "Claves para a Carreira Investigadora: Divulgación Científica e Perspectiva de Xénero en Enxeñaría", unha actividade enmarcada no Programa Mentoring de CINTECX e na conmemoración do Día Internacional da Muller na Enxeñaría (23 de xuño).
O encontro está dirixido ao persoal investigador predoutoral, persoas doutoradas recentemente, así como ao alumnado de TFG e TFM interesado en coñecer mellor os retos e oportunidades da carreira investigadora.
Ao longo da xornada abordaranse cuestións de especial relevancia para o desenvolvemento profesional do persoal investigador, entre elas:
- 📢 A importancia da divulgación científica na carreira investigadora.
- 🛠️ Ferramentas e boas prácticas para comunicar a investigación á sociedade.
- 🌍 Experiencias de divulgación científica e participación en proxectos europeos.
Ademais, celebrarase a mesa redonda "Divulgación científica e perspectiva de xénero en enxeñaría", na que investigadoras e profesionais de distintos ámbitos compartirán experiencias e reflexións sobre os desafíos e oportunidades para avanzar cara a unha maior visibilidade e participación das mulleres na enxeñaría.
No marco desta celebración presentarase tamén a I Edición dos Premios CINTECX–Beatrice Hicks, unha iniciativa destinada a poñer en valor referentes femininos que contribuíron a abrir camiño ás mulleres no ámbito tecnolóxico e industrial.
📍 Lugar: EEI – Sede Campus (Vigo) (pendente de confirmación)
🕙 Horario: 10:00 – 12:00 horas
🎟️ Acceso libre. Prazas limitadas ata completar aforo.
📝 As persoas interesadas deberán formalizar a súa inscrición antes do 15 de xuño a través do formulario habilitado.
Talento preparado para transformar o mundo.
📅 Luns, 8 de xuño de 2026
📍 Auditorio Mar de Vigo
A Escola de Enxeñería Industrial celebrará o vindeiro 8 de xuño o acto de graduación do alumnado que remata os seus estudos este curso académico.
Será unha xornada moi especial para celebrar co equipo directivo, o profesorado e as familias o esforzo, o compromiso e todos os momentos compartidos ao longo desta etapa universitaria.
Un acto cheo de emoción co que despedir unha etapa inesquecible e dar a benvida a novos retos e oportunidades.
Esperamos contar coa túa presenza e compartir contigo este día tan significativo.
Programa previsto:
- 🕓 16:00 horas. Fotografías no exterior do auditorio (familias, grupos...)
- 🕓 16:30 horas. Entrada dos estudantado.
- 🕓 17:30 horas. Entrada de familiares.
- 🕓 17:45 horas. Recepción de autoridades.
- 🎓 18:00 horas. Comezo do acto.
- 🏁 20:00 horas. Finalización do acto.
Podes consultar máis información na seguinte ligazón.
Claves e tendencias
📅 Mércores, 20 de maio de 2026.
📍 Salón de Actos da Escola de Enxeñería Industrial - Sede Campus da Universidade de Vigo.
🎟️ Asistencia gratuíta.
📝 Inscrición a través deste formulario. Indicar se se desexa particiar no xantar.
A Escola de Enxeñería Industrial - Sede Campus acolle unha nova edición do Seminario de Loxística, un encontro de referencia que reúne cada ano a profesionais e expertos do sector para compartir coñecementos, experiencias e tendencias en áreas como a cadea de subministración, a produción, a distribución e a loxística inversa.
Organizado polo Grupo en Enxeñería de Organización (GIO) da Universidade de Vigo, o seminario combina visión estratéxica e casos prácticos da man de profesionais de prestixio.
A dirección do Seminario corre a cargo de D. José Carlos Prado Prado, Dr. Enxeñeiro Industrial e Catedrático do Departamento de Organización de Empresas e Marketing da Universidade de Vigo.
O programa deste ano será o seguinte:
- 9:50 horas - Inauguración a cargo de D. José Fariña, Director da Escola de Enxeñería Industrial e de D. José Carlos Prado, Director do Seminario.
- 10:00 horas - De prototipos a produción: consolidación dun produto aeronáutico.
- Héctor Estévez Pomar, Director xeral e socio en Centum Research & Technology.
- David Casasnovas Fernández, Director de operacións e socio en Centum Research & Technology.
- 11:00 horas - Retos e expectativas na distribución urbana de mercadorías.
- José Carlos Espeso Illera, Xerente de mobilidade e Distribución Urbana en AECOC.
- Mesa redonda con Sarai Rodrigo (Responsable de loxística e transportes en GADISA), Pedro Conde (Responsable de loxística de Distribución en HIJOS DE RIVERA S.A.U) e Transportista (pendente de confirmación).
- 12:00 horas - Pausa café.
- 12:30 horas - Estruturación e mellora de procesos en contornos de crecemento: casos prácticos nunha empresa do sector da construción.
- Ignacio González Montes, Adxunto á Xerencia en Plaintec Obras y Servicios.
- 13:30 horas - Cando as persoas moven a loxística: o poder dos equipos de mellora en Congalsa.
- Diego Álvarez Pérez, Director de planificación e loxística en Congalsa.
- Antía Moledo Gugliotta, Xefa de loxística en Congalsa.
- 14:30 horas. Xantar opcional en «La Cocina de María» (Área comercial da Universidade de Vigo). Importe pendente de confirmar.
💡 Por que asistir?
- Coñece as últimas tendencias en loxística.
- Escoita experiencias reais do sector.
- Conecta con profesionais e empresas.
Agardámoste en Vigo!
Cando a enxeñería se converte en imaxe!
Tras a celebración da entrega de premios do IV Concurso de Fotografía "Enxeñaría Industrial na Sociedade", convocado pola Asociación de Enxeñeiros Industriais de Galicia (AIIG) e o Ilustre Colexio Oficial de Enxeñeiros Industriais de Galicia (ICOIIG), o vindeiro xoves 30 de abril, a partir das 12:30 horas, terá lugar no vestíbulo da Escola de Enxeñería Industrial - Sede Campus, a inauguración da exposición das fotografías finalistas e gañadoras.
A exposición podrá visitarse ata o 15 de maio.
Este certame pretende pór en valor a conexión entre enxeñaría, sociedade e creatividade e busca achegar a enxeñaría industrial á cidadanía, amosando o seu impacto en ámbitos como a enerxía, a industria, a innovación e a sustentabilidade.
Engloba todas aquelas imaxes que representan a enxeñaría industrial, a súa estética, o seu espírito e a súa importancia na nosa sociedade.
Animámosvos a acompañarnos nesta presentación e a visitar a exposición para descubrir, a través de cada imaxe, unha nova forma de entender a enxeñaría industrial.
Queres participar nun proxecto real de intelixencia artificial este verán?
O vindeiro xoves 23 de abril, a partir das 17:00 horas, terá lugar no Paraninfo da Escola de Enxeñería Industrial - Sede Cidade, a presentación das Bolsas de Verán 2026 de Anfaia.
Este programa está dirixido a estudantes universitarios e de Formación Profesional con interese na intelixencia artificial, a programación e o desenvolvemento de proxectos open source, e ten como obxectivo impulsar iniciativas innovadoras que integren a IA en diferentes ámbitos da sociedade, cun enfoque ético e responsable.
Durante a sesión explicarase o funcionamento do programa, os tipos de proxectos que se desenvolven e o modelo de mentoría ao longo do verán. Ademais, haberá un espazo para resolver dúbidas sobre o proceso de solicitude.
Se che interesa a intelixencia artificial, non deixes pasar esta oportunidade e inscríbete no seguinte formulario para asistir á presentación!
Celebra con nós o próximo RobotFriday!
O vindeiro venres 17 de abril terá lugar a 9ª edición da Competición de Robots da EEI na Escola de Enxeñería Industrial – Sede Campus, a partir das 10:45 horas.
Queremos que sexa unha xornada na que poidamos gozar coa presenza de estudantes e profesorado dos distintos centros educativos da nosa comunidade, unha xornada de convivencia chea de sorpresas, premios e sorteos entre os equipos inscritos, na que poder compartir experiencias con outras persoas coa mesma paixón pola robótica.
Unha oportunidade para pór a proba todo o voso talento e creatividade, aprender e mellorar as vosas habilidades en robótica dunha maneira divertida, vivindo unha experiencia inesquecible.
Esperámosvos o 17 de abril no RobotFriday da EEI!
Podes consultar máis información na seguinte ligazón.
